話說小編 早兩日放假， 特登去返以前中學嘅附近行吓食吓嘢。 發現一間以前食開嘅茶餐廳就嚟唔做，突然有啲感觸。所以就拍咗呢條片記錄一下以前成日食嘅餐廳，都分享吓附近有啲咩學生都啱食嘅平靚正之選。
① 幸福
粟米肉粒飯（午餐） $52
揚州炒飯（午餐） $52
第一間係幸福小廚， 係小編學生call嗰陣食得最多嘅餐廳貪佢夠近、大碟、濃味、亦都唔貴。呢間嘢裝修雖然殘舊同逼啲，但勝在有人情味，姨姨雖然唔多笑，但會記得你鍾意食咩飲咩。佢本身出名嘅係粟米肉粒飯，啲茨同粟米多到好似瀑布咁，好鬼誇張，但小編覺得佢太濕飯會爛，所以食過一次就算。
我個人鍾意食呢度嘅炒飯，尤其揚州炒飯，即叫即炒，夠熱夠晒鑊氣，外表色澤金黃，飯粒乾爽，有蛋香，碟底唔會油淋淋，加埋唔同口感配料。味道雖然唔算驚為天人，但一啖有咁多味道同口感，足夠洗刷一個學生嘅疲憊。
小編實在估唔到會咁快見到佢呢一日嘅到來，心裏有百般不捨同無奈，但都只可以感嘆時光飛逝。諗諗下成日見老細喺廚房身水身汗，可能真係要「見攰唞下」！
味道：7.5/10
幸福小廚 (元朗)
元朗鳳攸南街3號好順景大廈2座地下50號舖
②爽
醉雞河粉（新鮮雞）$69
第二間係爽爽。呢間嘢相信好多元朗人，甚至區外人都會識。 小編記得佢以前喺而家香蕉仔附近，嗰時舖頭細細，已經好多人排隊，所以都唔係成日有機會食到。 放lunch嘅時候，一定要有同學衝過去先攞到位。
佢主要係食醉雞嘅，佢呢度特別在有冰鮮雞同新鮮雞嘅選擇。當然小編以前學生時期都淨係識得起冰鮮雞，但小編覺得魔力係醉雞汁嗰度，花雕嘅香味非常之香，而且鹹味亦都好夠，無論冰鮮定新鮮雞浸落去都一樣好味，所以嚟嘅朋友可以額外叫佢俾兜雞汁，創落碗麵度更加正。當然兩款嘅肉質上會有啲分別， 小編都係大個出嚟做嘢先會食新鮮雞， 新鮮雞係比較緊致同有彈性，唔會太肥膩，鍾意食呢種雞嘅朋友可以試吓加錢轉。
另外辣椒油同豬扒都幾出名，食麵嘅話枱枱都會落辣椒油。係香得嚟慢攻嘅辣，食得好舒服。
味道：8.2/10
爽爽麵店 (元朗)
元朗鳳攸南街3號好順景大廈地下7號舖
③開心
豬扒太陽蛋飯（加飲品）$53
第三間係開心小敍。小編會形容係快食同肉色之選。 以前讀書想快快趣食完返學校，又或者想食多啲肉，或者啲邪惡嘢嘅時候嘅時候就會去呢間。佢出名嘅係佢哋嘅開心豬扒， 佢哋嘅豬會煎得非常之 好，側邊嘅位置會有微微嘅焦脆，味道係獨門嘅醃料味， 鹹鹹地少少甜，最突出嘅係香茅味道。肉質方面唔係拿到好腍嘅豬扒，佢唔會乾柴，腍得嚟仍然保持豬扒肉質同纖維感。 配上佢哋嘅甜豉油同埋太陽蛋蛋汁，就係一個完美嘅Comfront Food。
味道：7.6/10
開心小敘 (元朗)
元朗鳳攸南街3號好順景大廈1座地下43號舖
今日睇返原來呢三間成日食嘅餐廳都係用一個心情做餐廳名，好感恩自己學生時期因為呢幾間餐廳而感受到爽、開心同幸福。多謝你哋。
#hkig #hkfoodie #hkfood #hkeat #香港美食 #食評 #香港食評 #香港生活 #小紅書 #香港必食 #yuenlong #yuenlongfood #localfood #friedrice #highschool #secondaryschool #memory #goodolddays #元朗 #元朗美食 #隱世 #茶餐廳 #醉雞 #炒飯 #豬扒 #街坊小店 #回憶 #童年回憶 #童年 #中學
DarumaFoodie